Pse është i nevojshëm zbatimi i dënimit alternativ?
Zbatimi i dënimit alternativ në Shqipëri, i ofruar nga Zyra e Shërbimit të Provës, synon të konsolidojë dhe promovojë të drejtat e njeriut, të zgjerojë përfaqësimin e interesave dhe nevojave të ndryshme të shoqërisë, të kontribuojë në zhvillimin dhe emancipimin e shoqërisë, përfshirjen dhe pjesëmarrjen e komunitetit në procese të rëndësishme institucionale, parametra të domosdoshme për cilësinë e një demokracie në zhvillim.
Objektivat
Ndër objektivat që synon zbatimi i dënimit alternativ mund të rëndisim:
- Krijimin e një mundësie të dytë për të pandehurit që paraqesin probleme të varësisë me drogën dhe alkoolin, probleme të sjelljes, të personalitetit, të agresivitetit dhe të menaxhimit të zemërimit.
- Trajtimin e duhur mjekësor, psiko-social me qëllim rehabilitimin e tyre.
- Integrimin e tyre në shoqëri që do të mundësohet në bashkëpunim me institucionet përkatëse si Ministria e Punës, Çështjeve Sociale dhe Shanseve të Barabarta dhe Ministrisë së Arsimit( sigurimi i kurseve profesionale, shkollimi, punësimi dhe strehimi)
- Krijimin e besueshmërisë tek publiku i gjerë mbi efikasitetin e zbatimit të dënimit alternativ në Shqipëri.
- Institucionalizimin e dënimit alternativ në Shqipëri.